فيه واحد فاته القطار و واحد داسه القطار

بقلم :ميدو الشطور
هل علينا الشهر الكريم بنفحاته و روحانياته و أبى التلفزيون المصري ألا يمر هذا الشهر الكريم دون أن يرفع ضغط المشاهدين من برامج تافهة و مسلسلات رديئة و اعلانات و حط تحت اعلانات مليون خط
و بالأخص بالأخص اعلانات السيد طارق نور ( المستفز جداً ) و ابرزها اعلانات الضرائب و التي يظهر فيها بصوته كحامي لحمى الضرائب و قد اختار ممثلاً خفيف ليمثل دور تاجر بيترعب موووت من التهرب الضريبي و نهايته الحتمية المعروفة و هي السجن و ما ادراك ما سجون مصر
و من خلال متابعتي لهذا التاجر فإني أجد له تأثيراً عكسياً على الهدف من الإعلان فهو و السيد طارق نور يستفزان أي شخص من دفع الضرائب اذ يقول سيادته أنه بدون الضرائب لن تبنى المدارس و لا المستشفيات و لا المرافق و يمتد اعلانه ليشرح زيادة التمويل الضريبي في السنوات الأخيرة حتى وصل ل 7 مليارات جنية مما يدل على نجاح السياسة الضريبية في السنوات الأخيرة و رغم هذا النجاح لم يتم بناء المدارس و لا غيرها بل لم يتم اصلاح التالف منها ، فقد نشرت جريدة الأهرام حادثة طريفة تحكي عن أن مدرسي أحدى مدارس محافظة الشرقية قد فوجئوا بدخول قطيع من الأغنام يرافقه أحد المزارعين على حماره من خلال فناء المدرسة و ذلك نتيجة تهدم سور هذه المدرسة و عدم تمويل بناؤه !! هي فلوس الضرايب بتروح فين ؟

و قد ارتكز الاعلان نفسه على طائفة تجار القماش ( الظاهر بقى مغضوب عليهم من قبل الحكومة و السياسة الحكيمة ) و مش عارف ليه مثلاً معملوش الاعلان على تجار الحديد مثلاً مثلاً و لا يمكن الحديد معلهوش ضرايب و لا يمكن لو عملوها كده يزعلوا منهم لجنة السياسات
و بمناسبة الضرائب يتم التحقيق مع بعض الفنانين المشاهير حالياً علشان اتهربوا من الضرايب و من ابرزهم صلاح السعدني و اسماعيل عبد الحافظ و محمود عبد العزيز و مجموعة اخرى مع اني بصراحة مشفتلهمش انشطة كثيرة في الفترة الاخيرة بالمقارنة بمجموعة من الاعلاميين و مقدمي البرامج مثل الكابتين شوبير مثلاً يعني و لا يمكن الفنانين دول كانوا غلطانين انهم ما مشيوش في السكة الصح
ما علينا و يرجع مرجوعنا للسيد طارق نور فقد اتحفنا ايضاً باعلان مستفز عن البطالة و يظهر فيه بصوته يحاور احد الشباب العاطلين على القهوة وهما بصراحة اكثر من واحد في اعلانات متفرقة لها نفس الفكرة و المضمون المهم السيد طارق نور يبدأ بتوبيخ الشاب و يقول له
انت قاعد ليه قوم شوف شغل البلد بتتحرك ( هي فين يا اخويا البلد اللي بتتحرك دي و لا يمكن احنا مابنشوفش و لا يمكن تكون بتتحرك للخلف )
المهم الشاب يرد عليه و يقول له : انه معاه شهادة عالية و ان المطلوب عمال في مصنع
فيرد السيد طارق و يقول له : ايه يعني شهادتك العالية دي و ايه يعني تشتغل عامل في مصنع و لا هو مش من مقامك
و من هنا يتضح لنا عدة ملاحظات و من اهمها ان هذا الاعلان موجه لابناء البطة السوداء و ليس لابناء البقرة الحلوب اصحاب المقامات العليا في هذا البلد
و من الآن انصح الأباء من طبقة البطة السوداء ألا يضعوا أي آمال أو طموحات في أبنائهم و مستقبلهم فالنتيجة واحدة في كل الأحوال عامل في مصنع أو أرزقي أو أي شغلانة ياكل منها عيش و يريح دماغة و طز في شهادته و طز في نبوغه وظز في تفوقه أما أنت يا من اشتريت رأسك و أهملت دروسك وما عملتش زي غيرك من الطلبه المتفوقين فهنيئاً لك هتطلع زيك زيهم و أحسن و ممكن تبقى ريس عليهم و تديهم بالجزمة و تطلع عقدك فيهم
المهم الشاب يرد عليه ان الشغلانة متناسبهوش و محدش هيرضى يجوزه بنته لو عرف انه شغال عامل في مصنع
و طبعا ً أبو البنت هيكون له حق لأن طبيعي ان البني آدم لما ييجي يختار واحدة هتكون مناسبة لمؤهلة و ابناء مؤهلة اللي بيشتغلوا في شغلانتهم بعد معافرة و طلوع روح بيقبضوا يدوبك 130 – 500 جنية فما بالك بعامل المصنع
المهم بيرد عليه و يقول له : و مين هيجوزك بنته و انت عاطل ؟
بيرد عليه الشاب و يقول له : الحكومة تشوف لي شغل و أنا اشتغل
فيرد عليه سي طارق و يقول له : الحكومة هتعمل بيك ايه دول مش عارفين يودوا 6 مليون عمالة زايدة عندهم فين ؟
طبعاً الحكومة هتودي ولاد البطة السوداء فين دول ملهمش غير ربنا و عليهم انهم يرضوا بنصيبهم و يشتغلوا عمال و بعدين ايه الحكومة مش عارفة تودي العمالة الزايدة عندها فين هي السجون فضيت و اهي فكرة حلوة لضباط الداخلية البواسل اللي فيه قضايا مغلباهم عندهم اهو ستة مليون راس الحكومة مش عارفة توديهم فين
و لما الحكومة مش عارفة تشغل خريجي الجامعات المصرية من ولاد البطة السودا ليه بيعملوا جامعات خاصة و اكاديميات لأولاد البقرة الحلوب يدخلوا فيها بمجاميع ضعيفة و كلية الطب فيها ب 60% و الهندسة ب 50 % ! و يا بلاش
أنا أقول الحل : الواسطة و الكوسة و المحسوبية ماهو مش معقول ولاد البقر الحلوب هيشتغلوا عمال في مصانع لا سمح الله انما ده مقتصر على ولاد البطة السودا حتى لو كان معاهم شهادات عليا كده كده اتخلقوا علشان يبقوا خدامين لاصحاب الثروات مشبوهة المصدر .... الباشوات الجدد .
المهم الشاب يرد عليه و يسأله الناس هتقول علي ايه ؟
يرد عليه ببرود و استفزاز يحسد عليهما هيقولوا عليك كسيييب
لا يا سي طارق ياللي في برج عاجي الناس هتشمت فيه و في اللي خلفوه و هيقولوا كلام كثير زي السم زي دمك كده و من ابسط الكلام دة

( كأنك يا ابو زيد ما غزيت )

(خسارة تعب أهله و صرفهم عليه في التعليم من غير نتيجة)
الشاب يرد عليه : و لو اشتغلت و مشوني اعمل اية ؟
يرد عليه بكل بجاحة ابقى ارجع لقهوتك تاني ( علشان تصرف الفلوس اللي انت لميتها )
بعد كدة الاعلان بينتهي بنصيحة من السيد طارق للشباب و يقول لهم ان فيه واحد ركب القطر وراح شاف شغلانة و را شغلانة لحد ما وصل و هنا يظهر شاب تظهر عليه علامات البلاهة و الهطل ويبدو أنه قد وصل لمرحلة من الجنون و العته فكان له تأثيراً عكسياً على الهدف من الإعلان المستفز و هذا الشاب يركب قطاراً فاخراً و من المفترض ان شاب في حالته رايح يشتغل شغلانة بسيطة علشان ملقاش شغل يناسبه انه يركب قطر من قطارات الغلابة لكن ما علينا متفرقش ما هي النهاية واحدة القطر هيعمل حادثة كالعادة و الشاب هيموت و يروح في مصيبة تاخدة و تاخد مخرج الاعلان باذنك يارب قولوا آمين

المهم يظهر الشاب في صورة عامل في مصنع و في الصورة التي تليها وصل لحاجة كبيرة في المصنع ده و يثني عليه احد رؤسائه يعني الموضوع بسيط يا ولاد البطة السوداء يتلخص في لقطتين و ما تحطوش في دماغكم التنطيط اللي هيتنططوه عليكم رؤساكم كعمال و طبعاً ريسك يا ابن البطة السوداء شهادته أكيد أكيد اقل منك يعني هتشوف
و بعد كدة بيجبلك شاب بيجري ورا القطر مع الجزء الثاني من نصيحة سي طارق و التي تقول ( و فيه واحد فاته القطر )

يحمد ربنا ان فاته القطر و اتكتب له عمر جديد و على فكرة العمر الجديد مالهوش أي علاقة بالفكر الجديد

أما بخصوص هذا الاعلان الواطي فأقول ان أي شاب في مصر عنده طموح بيقتلوا طموحه فمثلاً عندما حاول بعض الشباب و كان فيهم مؤهلات عالية كسب رزقهم من مشاريع التوك توك وقفت لهم الحكومة بالمرصاد و حاربتهم حرب لا هوادة فيها مع أن التوك توك بيستعملوه في الهند و دي على فكرة دولة نووية متقدمة عن مصر بكثييييييير علشان لقوا ان القرش هيجري في ايد ولاد البطة السودا يعني باختصار الحكومة سلمت ولاد البطة السودا للمستثمرين اللي جايين من برة علشان يشغلوهم شغلانات يستعبدوهم من خلالها و يطلعوا عينهم و يمصوا دم اللي خلفوهم و في نفس الوقت الفلوس متجريش في ايدهم
و بعدين يا ناصحين لما تشغلوا المؤهلات العليا في اعمال المؤهلات الاقل هتودوا الاقل فين
و اخر كلمة للسيد طارق نور ( فيه واحد ركب القطر و جاب فاتورة و الفاتورة جابت فاتورة و في الأخر بقى كلابيشوا مع هيثم )
و دي كانت فكرة اعلان مختصر يا ريت تعملها علشان الناس قرفت منك خلاص
يا خرابك يا مصر